大豬-愛剚也毋剚
幾下年來一直有恁樣个聲音，一到舊曆七月，義民祭中元節剚大豬个問題，又會登上社會版頭條引起議論，到底愛樣般形做正會得到正、反雙方面都能接受，實在係一隻相當頭痛个問題，因為這關係到單一一隻族群特有个節慶文化，必須愛用一種較嚴肅个心情來看待，毋係逐擺到中元義民節又分大家提出來討論，一擺一擺分輪值个鄉鎮或者義民廟帶來困擾。
自啀知人士以來到裡下五十零歲，總共剚過四擺大豬，第一擺係佇國小个時節，因為當時家境毋係盡豐湧，但係虔誠个爺哀因為匕過年正輪值一擺，還係省屎省尿刻挨撈人鬥股共下剚一條豬仔來普渡，可見義民个信仰深深影響老人家，卡苦吔愛誠意剚大豬奉獻義民爺，到裡下，隨等時代个腳步，老人家介代个觀念，對現下个後生人來講，有兜人並不認同，咩冇恁熱衷囉，所以裡下義民祭剚大豬个數量，一年不比一年，啀想，毋使幾多年剚大豬比賽就會變到盡難得个事情，到尾分人自然淘汰也冇一定，這咩盡愁吶？義民節冇剚大豬比賽，客家二三百年來个傳統祭典還剩嘛介分人看，電子花車係冇？！
正式講筆者咩當毋贊成裡下个大豬比賽方式，仰般講吶，頭擺大豬自家畜，其中个過程就係文化个一部分，捉豬仔來畜愛看日子，跌筶、再擱來畜大豬期間細人仔盡量毋好到豬欄下(驚細人亂講話)，愛剚豬以前愛食齋幾日，一連串个過程，一直到磅大豬撈逐出豬欄扛到禾埕，還愛唸四句講好話，這就係文化个一部分，非客族人士撈毋識遇大豬个人，佢里兜仰會知得其中个經過。
裡下人，工商化後看到豬欄就冇恁胲，除了庄下个老屋正有豬欄，地方上抽到總爐主或者有頭有面个人，就會花大錢買大豬，所以正有人專業來畜大豬，一條豬仔畜到比牛牯大卡條，實在冇必要，誠心最重要，自家畜个最誠意。？？這兜反對者提出來講个就係圈養過程不人道，強迫灌食，客家人有句諺語：「豬撐大、狗撐壞、人稱變精怪。」所以畜大豬个人就會用這種方式畜養，不感覺有嘛介不當，就像法國鵝肝醬咩係撈鴨仔，鴨仔撐到飽飽胲大大，鵝肝正會大粒共樣，還有關於殺生問題，這係各儕個人个自由，各人信仰不同，文化不同，生活方式也不同，原住民一年一度个狩獵祭咩係殺生，西班牙人鬥牛文化，個人認為更加殘虐，生生个一條牛，背囊頂刺等幾枝刀子，眾目睽睽下，人獸大戰，毋係牛死就係人傷或亡，何來文化，但係世界上誰不認為个就係西班牙文化特別之處。
一隻族群愛改變，特有个節慶民俗文化，並非一時一節就可以改忒，慢慢來多宣導，用另一種方式，毋好比重，用比打扮或者蓬架花車還有創意神豬等方式來吸引人，就毋會有不當圈養強迫灌食个問題，慢慢个這文化緊改變到尾可能剚大豬愛發夢正看得到，愛政府或者義民廟補助正有人愛剚豬个，剚豬實在係盡痶頭个事情吶，毋係逐儕都好剚大豬吶！知冇….。
彭兆宏
留言列表
