江秀鳳、曾喜城、黃鼎松得到客家台灣文化獎

北美客家台灣公共事務協會、全美台灣客家文化基金會、北美客家台灣語言文化基金共下宣布2011年度客家台灣文化獎愛頒分:江秀鳳、曾喜城、黃鼎松三位鄉親,獎金壹仟美金同獎牌。預定今年八月佇台灣客家文化夏令營開幕典禮當中頒獎。這下佬三位得獎个鄉親介紹分大家知。

江秀鳳:台灣台中市人,做過國小佬醫學大學个客話先生,拿到「客語薪傳師」文學佬語言類證書後,佇台中教育大學大學佬菩提長青學苑開客家文學課程,同時佇電台教學,培育後生無數。佢長年從事客家語言、文學、音樂个研究佬創作,成績當好。文學方面,佢盡用心,佇詩歌、散文佬詩畫方面出過六本書:《逗點》、《薰衣草姑娘》、《江嵐、采諭詩畫家鄉專輯》、《阿婆个菜園》、《曾文溪个歌聲》、《生命个樓梯》,辦過九場詩畫展。佢有心个結果,得到文化界大大个認同、賞識,得過12擺文學獎,範圍包含詩、小說佬散文,其中李江却台語文教基金會客語組小說優選得到兩擺,2008年還得到新竹市客語兒童文學客語散文奬特優、優等兩隻獎。
除忒這以外,佢到處演講,開講座,接受電台專訪,時常接受各大社團个邀請吟唱詩歌,影響力越來越大。

曾喜城:屏東縣內埔鄉人,佢佇台北大中小學教書30年正退休,得過台北市第一屆Power教師獎、客語演說台灣區教師組第一名。出版个文學創作佬學術著作當多種,乜得過大武山文學首獎、台灣文學獎、中國語文獎章。2000年轉來屏東主持美和新故鄉社區營造文化產業經營工作,還做過美和村長,佇台北師範佬美和技術學院,教「台灣歷史」、「台灣傳統建築」、「客家文化」、「現代文學」等課程。2005年獲聘美和技術學院專任副教授兼文化事業發展系主任,兼任屏東科大佬屏東教育大學客家研究所副教授。2009年又得到教育部母語文學創作詩歌類第二名。 佢佇學術研究方面,出過《宗聖公祠》、《六堆客家傳統建築研究佬《六堆客家伙房建築研究》三本書,文學創作方面,2010年乜出版《心之所在,就是故鄉》,做得講係盡關心客家文化个學者。

黃鼎松:研究客家文化、鄉土文史30零年,前後撰述、編輯,抑調查研究苗栗縣客家地區个鄉鎮市志、村庄村史,一共30零種,其中較重要个有:《苗栗史蹟巡禮》、《苗栗開拓史話》、《苗栗山水紀事》、《先民的足跡》、《苗栗的開拓與史蹟》、《苗栗文昌祠》、《苗栗縣古道專輯》、《苗栗百件重大史事》,96年乜重修《苗栗縣志》,對客家文化个發揚,貢獻盡大。

除忒寫書,佢乜結合社區推動當多活動。1999年10月苗栗縣社區大學成立,佢擔任執行長,帣手校長推動校務。2001年起,佢乜配合苗栗縣社大,指導獅潭、苗栗、公館、造橋个部份村里寫村里个歷史。1999年11月,佢結合地方人士成立「苗栗縣鄉土文化學會」,辦理客家文化研習,蒐集整理同編印地方文獻史料,效果盡大。2000年元月起,佢又主持公共電視台「發現客家」个節目,總共24集,深入探討臺灣較具代表性,抑較特殊个36座客家庄个文化佬發展。

arrow
arrow
    全站熱搜

    hakka226 發表在 痞客邦 留言(0) 人氣()