客家雜誌社

從客語辭彙看客家文化      范文芳

一、人類用語言來看待生活中个各種事物、現象、道理

一、    用語言來定名、安名、號名、稱呼對象

        一群人，因為歷史、地理、族類、血緣、、、各種主、客觀因素，在一處位所，共同生活，為了溝通、表達个需要，漸漸發展出佢兜个語言符號。若係用學術个角度來看，該地區、該族群發展形成个語言，包含語音、語音後背代表个語意，以及比較複雜个語意習慣上个講法，裏種習慣講法，其實包含幾項重要个質素：

（1）對於共樣个對象物，各族群語言會用無共樣个稱呼，裏就係佢兜个構

          詞方式，也就係佢个定名、安名、號名風格，後背反應了裏族群个生

          活內容、生活方式、生活態度。

（2）一段比較豐富、複雜、委婉个語意，會包含相當多个詞彙，詞彙扌老

詞彙之間个先後位置，會產生無共樣个功能用途，比像講表示顏色个fung⁵，做得表示客家話中个“血”，例：豬紅、雞紅，裏係名詞。也做得表示一種色彩，例：大紅花，紅瓦屋，裏係形容詞。甚至做得表示一種動作、行為、過程，例：柿子紅了，裏就變成動詞。就漢語个構詞方式扌老習慣講法，紅花、花紅係無共樣个語意。

               （3）就文化差異个角度來看，詞彙，包含單字、複合詞，以及詞个變形扌老

                         先後个排序，後背含有相當深層个感情、認知、價值。

二、從比較特殊个客語詞彙來看客家文化

1.客家人見面打招呼，常用个講法，其背後隱含个文化觀察：

      （1）『an¹ 早』，「an¹ 早 ci¹」，an¹ 係程度副詞，俗寫恣，在農業社會以勞動

                為主之生活，越早醒床，做得做越多工作，故所「an¹ 早」係稱讚，

                不係問安、祝福，不同於華語之早安，也不同於英文个 good  morning，

                反應了早期客家生活个辛勞、勤奮，招呼語充滿了期許、勉勵，不係輕

                鬆个問候、祝福。

      （2）正來料，字面語意係“再來玩”，用法係類同華語个“再見”，HOKLO  話个“再來cittor”，HOKLO話tittor或cittor，字首个輔音係舌尖塞音移動為舌尖塞擦音，裏係雙聲聯綿詞，無所謂正確之漢字，一般通俗做“     ”。客家話“正來料，音liau7”，有人寫做聊、嫽，音liau5，顯然音、意皆不合。此招呼語，多用於告辭時，料字係不及物動詞，當有可能係假借字，也有可能係扌老非漢語个語言接觸，借用過來。客家人既無“再見”个習慣講法，也無用類似“see you again”，“good bye”等講法，仍然反應了客家人生活勞碌，無幾多閒時間、閒心情，為了體惜對方，會講一句“有閒正來料！”

2.幾個特殊个親屬稱呼

      （1）「阿公婆」，在客家詞彙裏背，阿公婆，泛指已經過身个歷代祖公、祖婆，在信仰生活頂背，阿公婆也可以升格到神明个地位。故所，堵著過年、過節、婚娶大事，都愛「敬阿公婆」、「拜阿公婆」、「拜爺」，其他漢族，也普遍有祭拜祖先个習俗，但是，客家文化中，「阿公婆」、「拜阿公婆」已經形成專有名詞，裏係比較特殊个一面。

      （2）「姊公」，「姊婆」。在台灣个客家人，除了東勢客、六堆客之外，大部份客家人都習慣用姊公、姊婆來稱呼外祖父、外祖母。早期个農業社會，重視男丁个香火承傳，以及人手勞力个重要，往往有收養童養媳个習俗，家中得到盡便宜个女童工，一方面做得照顧小弟，二方面幫手做家務，三方面得到心舅。因為婦娘年紀比老弟較大，故所客話保存稱妻「姊仔」、「婦娘姊」、「老姊」个稱呼，妻个父母，就有外孫稱呼「姊公」、「姊婆」个特殊親屬名稱。

3.客語中對身體官能，有當特殊个詞彙

      （1）「無身」、「圓身」，對於人體，不分老嫩、男女，全做得用無身、圓身來指稱，若係再進一步講究，無身係軀幹扌老手腳四肢，有分四縣腔較慣用圓身，海陸腔較慣用無身，從語意來看，圓身有可能形容身軀大略个外形；無身一詞，若係語音个變異，有可能係軀身个HOKLO 音 KUSHIN 轉變做 VUSHIN；若係語意个聯想，就有可能暗指忘物、忘我、看空个哲理講法，其實也表現出謙虛个自稱語意。

      （2）「目汁」，華語慣稱眼淚、淚水，HOKLO 話慣講目屎，客家人獨用目汁，指稱從目珠流出來个汁水。假使用一兜語言心理个聯想，淚水个濃稠程度最淺淡，汁已經比水較濃，HOKLO人个目屎，已經濃稠到快要變固體了，實在有傷心。

      （3）「鼻」，單字看起來無麼个特殊，進一步用字音、字形、字意來分析，就表現了客家語言文化个特色了。

         1、字音       客家話音Pi⁷ 陽去調，華語bi⁵ 陽平調，HOKLO話亦音Pi⁷，

                                中古漢音係濁聲並母字，濁聲清化之後，客話就用送氣音陽聲

                                調來存古，不過，四縣腔就併入陰去調，多少失去了存古音个

                                特色。

         2、字形       漢字个字源，盡早个甲骨文，用畫出像鼻个“自”字，後來又

                                加上聲符畀，變成形聲字个鼻字，今日中文大抵用鼻字指五官

                                之一，用自表示己身，其實係假借字个用字法。假使了解漢字

                                「自」原來係「鼻」，係引申為自己、自家，就會了解客話「奢

                                鼻」係誇言自己个意思。

         3、字意       又愛看這隻字个語法功能，大約可以分做四種用法：

                                a、當做名詞，指人身上个五官之一，客話有鼻、鼻空、鼻公

                                        等詞彙。

                                b、當做代名詞，表示自己，客話有奢鼻一詞，係誇言自家个

                                        意思。           

                                c、當做動詞，客話扌老HOKLO相同，用“鼻”去試味，比

                                        華語“聞”合理。

                                d、當做形容詞，客話扌老HOKLO相同，常用siau5（溲）pi7

                                        （鼻）做貶意詞。

4.客家話偏好用身上排洩物來罵人

      （1）鼻    鼻，本來指器官，也做得表示鼻水，有人加上偏旁水，寫作濞，客家話形容比不上人家，古文用望塵莫及，俗話講「鼻佢毋著」。對某人完全外行，也講「佢毋知溲鼻」。

      （2）屁    漢語共同个用法，慣用來貶責他人，客家話常用「屁卵」來形容他人之鬼扯，亂講。

      （3）尿    華語常用「尿包」、「尿遁」罵人，客話比較少用尿罵人，有時會罵細人仔「Lai尿牯」、「Lai尿女麻」，Lai⁵係指直接將尿水排放在褲、眠床頂項。

      （4）屎    比較起來，客話个貶意詞，偏好用「屎」，下背有幾則常用个詞例：

                        a、焗屎  指屎悶於肚腸內，發酵發臭，比喻奢鼻，得人惱。

                        b、屎包  指歸隻身體像裝屎个布包，比喻不講道理。

                        c、屎噴噴      指屎味衝天，比喻驕傲、自視甚高，得人惱。

                        d、屙巴、屙痢肚、屙膿滑血      本來係指腹瀉、拉肚子，比喻一隻

                                                                               人負責任，言行相當差。

                        e、屙糟  指排洩出來之穢物，比喻無淨利，違反法理个事情。

                        f、屙屎毋出怨豬母       早期廁缸在豬欄隔壁，屙屎毋出，怪怨隔壁                                    豬母喂喂滾，比喻推卸責任，責怪他人。

      （5）溲    客語同HOKLO，音siau⁵ 陽平聲，本來指男人精液，借漢字溲來用，也有人借漦字來用，比喻低賤，渺小，常用詞語有「毋知溲鼻」、「無溲無鼻」、「奈隻溲貨仔」、「講麼个溲話」、「干你溲事」。

1. 客家話對家畜个稱呼，當有人情味

      （1）投生                偏指雞、鴨、鵝，用佢兜做犧牲時，在割頭个時節，會唸「下

                                二擺去投生」。

      （2）鴨公聲    不論番鴨、土生，凡係大鴨公，向他人示威時，發出沙啞个赫

                                赫聲，比喻一隻人講話聲音沙啞。

      （3）豬紅、雞紅、鴨紅                客家人避開講「血」，轉用「紅」來表示。

      （4）牛眼                客家耕種人，用牛个目珠來指稱一種水果名，果个大細、肉色、

                                果核非常相似牛目珠。華語用桂圓、龍眼，HOKLO也用龍眼，

                                比較之下，客家人个詞彙生動、親切、樸實。

      （5）牛核卵    本來指牛牯个生殖器官，有客家人用來指稱華語个芒果，

                                HOKLO話个木羨仔、酸仔。

      （6）牛欄肚鬥牛母                本來指大牛牯在自家牛欄內欺負牛母，比喻只曉得在

                                                家內施暴，毋曉得保護家人个行為。

1. 客家話个名詞詞綴，也盡有特色

      （1）阿            附加於詞首个詞綴，雖然華語、HOKLO也有裏種構詞，不過，

                                客話使用个頻率較高，同時，其並無貶義，像阿公婆、阿太、

                                阿公、阿婆、阿舅、阿姑、阿姨、阿爸、阿母、阿伯、阿叔、

                                阿哥、阿姊、阿嫂、阿嬸、、、。 

      （2）牯            泛稱雄性，人、畜皆可用。慣用在附加詞尾，像牛牯、狗牯、

                                大箍牯、大石牯、阿雄牯、大頭牯、、、。

      （3）女麻                本來就係母字，俗借女麻字專做附加詞尾，已失去雄、雌之實

                                詞意義。語用上，稍稍有親妮、親切、貶責个意思。像車女麻、

                                鯉女麻、镬女麻、刀女麻、夭壽女麻、癲女麻、賺食女麻、、、。

      （4）公            客家話做得用做輩份上个尊稱，也可以用來表示雄性个動物，

                                一旦用在附加詞尾，本意就淡化，甚至消失，像碗公、蝦公、

                                烏蠅公、白頭公、蟻公、石頭公、大樹公、、、。

      （5）婆            客家話本來係公、婆對應，有雄、雌長輩个意思，放到附加詞

                                尾，本義漸失，像蝠婆、鷂婆、白頭婆、芒婆、襖婆、、、。

1. 客家庄个地名，充分表現出樸實个風格

      （1）地形寫實                山頂常見个地名，有龍、艮、崠、頂等。

                                        平平个山地，有坪、埔、林等。

                                        山谷地形，有窩、壢、坑、窟等。

                                        低窪地形，有湖、濫、窟等。

                                        形狀表示，多用面、排、角、糞箕、碌碡、犁等。

                                        外形表示，多用鳥獸，像鳥喙山、鵝公髻山、獅頭山、飛

                                        鳳山。

      （2）地上物植物名多            樟樹林、香圓窩、芎蕉坑、菜瓜窩、柯仔林、樹

                                                        杞林、黃梨園、艾仔埔、大茅埔、豆仔埔、麻園

                                                        湖。

      （3）產業形成地名                        腦寮、紙寮、火庚寮、隘寮、田寮、鹿寮、斗換

                                                        坪。

      （4）人家形成地名                        四座屋、十八間、彭屋、新屋、宋屋。   

      （5）水利形成地名                        枧頭壢、水汴頭、圳頭、水尾、埤塘、河壩。

1. 客家話个鳥仔文化

      （1）多用聲音來安鳥名                補鑊仔、夜刮仔、阿啾箭、禾嗶仔、烏喙嗶。

      （2）借鳥字用做動詞            客話做名詞个鳥，陰平聲調，做動詞个鳥，陰上

                                                        聲調，文雅个用法係指理睬，莫鳥佢，即不要理

                                                        他；粗俗个用法係類似於HOKLO話个「幹」、

                                                        「駛」，華語个「肏」、「操」，專指性交動作。

      （3）別人用鳥做男性器官，客家人無裏種講法，現代華語有指露出性器示衆，

                稱遛鳥俠，HOKLO人習慣用「LAN鳥」一詞，客家話專用「朘仔」。

        （）別人用鳥做貶義形容詞，像華語罵人「做的鳥事」、「說什麼鳥話」，HOKLO

扌老客家比較慣用溲（siau），像「做个溲事」、「講个溲話」。

三、從母語詞彙，來恢復自尊、自信

1.帶有母語腔調个台灣國語，無麼个見笑个道理

2.保留母語辭彙个文化內涵，建立自家个價值觀